Псалом 4 («Всегда возвах тя боже живый на небеси…»)

Всегда возвах Тя Боже живый на небеси,
‎свидетелю правды им услышал мя еси.
И распространил в скорби и впредь да щедриши,
‎глас молитвы моея теплыя услыши.
Вы, сынове людстии, доколе живёте
‎в тяжкосердии тщетных и ложных ищете.
Ведите, яко Господь щедрый удивил есть,
‎преподобна раба си и чудне хранил есть.
Внегда воззову к Нему изволит ми вняти,
‎от всех наветов ваших и впредь защищати.
Гневайтеся во сердцех, а не согрешайте,
‎яже в них глаголете, на ложех смывайте.
Пожрите жертву правды, в Бозе уповайте,
‎оставите лукавство, правду содевайте.
Глаголют нецыи: кто явит нам благая,
‎аще будем творити делеса правая.
Се знаменася на нас свет лица Ти Боже,
‎иже делес истинны мзду знати поможе.
Дал еси веселие до сердца моего,
‎от плод пшеницы, вина, елеа Своего.
Умножение взяша аз же имам спати,
‎во мире купно с ними и здраво востати.
Яко Ты мя в надежду, Боже, вселил еси,
‎егда о стяжании царства явил еси.